Waray News: DepEd, gin-aaghat ibanan an pagtinambukon han kabataan

MANILA, May 15 (PIA)- Nagsasagdon an Food and Nutrition Research Institute (FNRI) ha mga eskoylahan nga magbuhat hin regular nga paugnat ha kusog basi maiban-ibanan an nagtitinambukon nga kabataan ug kabatan-unan.

An FNRI nga kasugbong han Department of Science and Tehnology (DOST) in nagsering nga an kadamoon han mga sobra an timbang nga kabataan tikang niyan han 1993 in haros nadoble na.

Para daw hadton kabataan nga nag-eedad hin 6 ngadto 10 anyos, dinoble daw ine an kadamo, tikang 1.3% han 2003, nagin 1.6% niyan han 2008.

Sumala kan Corazon M. CerdeƱa, chief science research specialist (SRS) han Nutritional Assessment and Monitoring Division han FNRI, basar daw han Nutritional Guidelines for Filipinos, an eksakto nga pagkaon han bata lakip na an pagkita-kita han ira kabug-aton in importante daman ha pagmantinir han normal nga pagtubo han bata.

Labot pa, importante daw daman an pag-ehersisyo han kabataan basi mabuligan an sirkulasyon han dugo pinaagi han maupay nga pulso han kasing-kasing ug baga lakip na an maupay nga pagmantinir han mga kusog.

Iginsasagdon daw han World Health Organization (WHO) an 150 ka-minutos hin pisikal nga ehersiyso, tikang pa paglalakat, pagdalagan ug mga uyas para han ngatanan nga edad han mga Pilipino.

An pag-ehersisyo daw in maiha an epekto ha lawas, sugad han sakit ha kasing-kasing, dayabites, hi-blood ug osteoathritis. .(PIA-Samar/Trans:Alice Nicart)

If you like the article, please share.



Comment icon Comments (Newest first)